6 ساندويتشات اقتصادية في الـ World Sandwich Day

في بداية نوفمبر من كل سنة، بيحتفل العالم بيوم الساندويتش العالمي، اشهر اكلة في العالم اللي اخترعها الإنجليزي جون مونتاجو.

تاريخ الساندويتش: 

اللي حصل إن إيرل ساندويتش سنة 1762 طلب من طباخه يعمله وجبة من غير ما يستخدم أدوات الأكل علشان كان مشغول ببعض الأمور فوقتها الطباخ قدم له لحم متقطع بين قطعتين من العيش المحمص ودا ساعد الإيرل في إنه ياكل بإيد واحدة من غير ما يتعطل عن اللي بيعمله.

وبالمناسبة دي هنقولك على ساندويتشات اقتصادية ومفيدة تنفع للفطار والعشاء وكمان مشبعة للأطفال في المدرسة تقدر، تحضرها بسهولة.

أفكار لساندويتشات اقتصادية سريعة التحضير:

1- تونة

المكونات:

·   نص علبة تونة بس لازم تصفيها كويس.

·   2 معلقة خل كبيرة.

·   بصل أخضر.

·   معلقة مايونيز.

·   بصل أحمر متقطع صغير.

·   رشة فلفل.

طريقة تحضيره:

• هنحط الخل على البصل علشان نتخلص من أي زفارة ممكن تبقى موجودة ونصفي التونة كويس.
• هنحط المايونيز والبصل والفلفل على التونة.
• هنقلب المكونات مع بعض كويس جدًا وبعدين هنحطهم في الساندويتش وبالهنا والشفا.

2- البيض

ممكن تخترع في الساندويتش ده زي ما تحب شوف بتحب تاكل البيض ازاي واتعامل: مسلوق أو أومليت أو مقلي بعد السلق أو عيون وممكن تحط معاه كمان جبنة مثلثات أو جبنة بيضاء واستمتع.

ماتنساش الطماطم وسنة ملح وكمون وفلفل ومخلل.

3- البرجر

لو عندك برجر فسهل إنك تحضره في أسرع وقت ممكن بس خلي بالك لو متجمد سيبه يفك شوية قبل ما تنزله في الزيت وتابعه علشان ميتحرقش منك.

ممكن تحط عليه جبنه شيدر وشرايح طماطم وتستمتع وبألف هنا.

ممكن تحط على البرجر أي حاجة من دول: بيض أومليت – شرايح بصل – جبنة – بطاطس.

فكرة الساندويتش بدأت لما إيرل ساندويتش طلب من طباخه يعمله وجبة من غير ما يستخدم أدوات الأكل سنة 1762 

4- دجاج البانيه

لو البانيه بيتي هنحطه فى الدقيق مع الفلفل الأسود والملح، وبعدين هنزله في البيض والبقسماط.

ودلوقتى نقدر ننزل البانيه في الزيت بعد ما بنسخنه كويس، وأول أما تتحمر من الناحيتين نحطها على مناديل مطبخ ورق علشان تشرب الزيت.

ويا سلام بقى لو ساندويتش البانيه فيه طماطم وخس و عليه مايونيز وكاتشب.

لكن لو البانيه جاهز ومطلعينه من الفريزر فبعد ما يفك ننزله في الزيت السخن علطول.

5- البسطرمة

شوية بسطرمة في طاسة مدهونة زبدة وعليها جبنة شيدر أو ممكن تدخلها الفرن.

السر هنا بيبقي فى: الملح والفلفل والمخلل وكمان الخس الأحمر والأخضر والمايونيز.

ممكن كمان تحمص الساندويتشات لمدة 3 دقايق على كل جنب قبل ما تحط البسطرمة.

6- جبنة بالطماطم

الساندويتش المصري الأصيل! جبنة بالطماطم والزيتون والخيار والفلفل أكله بيحبها الكبير قبل الصغيرة حلوة ومشبعة وسهلة التحضير كمان.