5 نصايح في الفصال زي ما بتعمل الأمهات!

هو الفصال عادة وحشة؟ طيب امتى أفاصل؟ وهل لازم أفاصل علشان أبان إني كسبت؟ بص هي مش خناقة لكن في أوقات كتير بتلاقي البياع بيأفور في الأسعار اللي بيقدمها فبيكون لازم تفاصل.

في بياعين تانيين بيحطوا يافطة زي "الفصال هواية جميلة من فضلك مارسها خارج المحل".. طيب ازاي أفاصل وأوصل لأفضل سعر من غير ما اوجع دماغي ده اللي هنقولك عليه، وازاي الأمهات شاطرين في الفصال؟

1-   ماتخافش من المحاولة!

أول حاجة لازم تكون مقتنع إنه مش عيب إنك تفاصل طالما بلطف وبدون سخرية أو كلام كتير للتقليل من قيمة الحاجة اللي هتشتريها، وكمان ماتتكسفش من فكرة الفصال طالما الموضوع مستاهل ومش هتخسر حاجة أصلًا.

2-   خد لفة الأول

قبل ما تفكر تفاصل في لبس عند أول بياع خد فكرة الأول عند باقي المحلات الاسعار عاملة ازاي، ويُفضل لو نفس الحاجة علشان تقارن كويس وتعرف السعر الحقيقي، وممكن تلاقيها في مكان تاني بسعر أفضل بكتير من غير ما تفاصل .

3-   خليك صبور

علشان تشتري لبس بأفضل سعر لازم يكون عندك صبر وتشوف البياع هل مدي فرصة لده ولا خلاص هو ربط دماغه على السعر دا.. فكر تمشي لو نده عليك يبقى لسه في كلام في السعر وساعتها الكورة في ملعبك هات أخره.

بعد ما تاخد لفة على كل المحلات على قد ما تقدر هيبقى من جواك عندك قناعة برينج السعر اللي ممكن تشتري بيه

4-   خليك مبتسم

لازم تفهم إنها مش معركة مين يكسب ومين يخسر، أنت عاوز تشتري والبياع عاوز يبيع وكل  طرف بيدور على مصلحته علشان كدا خليك مبتسم على قد ما تقدر في طريقة كلامك بعيدًا عن الخناق حتى لو البيعة ماتمتش، وخليك فاكر ممكن ترجعله تاني فسيب انطباع كويس.

5-   مش عيب إنك ترجع مرة تاني

بعد ما تاخد لفة على كل المحلات على قد ما تقدر هيبقى من جواك عندك قناعة برينج السعر اللي ممكن تشتري بيه، وساعتها هتحس إنه فعلًا يستحق من غير ما يتضحك عليك، وقتها ممكن ترجع لأول محل عادي وقفت عنده.