5 أنواع من بوليصات التأمين مش مشهورة اوى فى مصر!

في أنواع كتير من التأمين بتقدمها شركات مختلفة في مصر، لكن للاسف مش مشهور منها غير انواع قليلة جدا، عشان كده قررنا نقولك على 5 أنواع للتأمين مهدور حقها، هتعرفها للمرة الأولى منها التأمين على البضاعة المستورد، والتحف الفنية والأجهزة الطبية.

التأمين على البضاعة المستوردة

لو عندك بضاعة مستوردة زي المواد الكيميائية مثلًا تقدر تأمن عليها، وهنا التأمين بيحمي بضاعتك من أي خطر طول عملية الشحن والتفريغ، وبينتهي دور الشركة بعد وصول البضاعة للميناء أو بعد وصولها بـ 30 يوم كحد أقصى في حالة لو هيتم تخزينها لأي سبب.

أما أسعار البوليصة وشروطها بتكون مختلفة باختلاف الشركة والبضاعة لكن العميل هو اللي بيحدد مدة نهاية الوثيقة اللي بنأكدلك إنها ما بتتعداش شهر.

التأمين على المعدات الإلكترونية

تضم الأجهزة الكهربائية اللي تخص الاتصالات عمومًا زي الموبايلات الجديدة، والسنترال، والرادار وشبكات اللاسلكي والراديو وكمان الأجهزة اللي بتستقبل وبترسل الخاصة بالتليفزيون والراديو، ومحطات الأقمار الصناعية وغيرها كتير من المعدات الإلكترونية.

وفي النوع ده من التأمين الوثيقة بتغطي أي خسارة غير متوقعة تحصل للجهاز الإلكتروني ده ناتجة عن صواعق أو حريق أو أسباب كهربائية أو انفجار أو أي سوائل والتعرض لعمل تخريبي مقصود.

التأمين على الأجهزة الطبية

لو انت دكتور تقدر تأمن على الأجهزة الطبية في عيادتك زي أجهزة الرنين المغناطيسي، وأجهزة الأشعة، وأجهزة الإشعاع، وأجهزة الليزر، وأجهزة التحاليل وأجهزة التشخيص، وفي النوع ده من التأمين الوثيقة بتغطي تأمين الأجهزة الطبية نفسها.

التأمين على القطع الأثرية والتحف الفنية النادرة

النوع ده من التأمين بيغطي عملية النقل عن طريق البر أو البحر أو الجو لأي قطعة أثرية أو عمل فني نادر عموما، والتغطية بتكون مفعلة بداية من مرحلة التغليف والشحن والتفريغ والنقل والعرض كمان في الدول اللي هتستضيفها لغاية ما التحفة ترجع تاني لنفس مكانها الأصلي.

التأمين لأصحاب المعاشات

هنا مش بنتكلم عن التأمين الاجتماعي لكن نقصد ازاي تصرف معاش من شركة تأمين جنب معاشك الأساسي؟ وفي النوع ده كمان أسرتك بتقدر تحصل على مبلغ تأمين بعد الوفاة لكن الشرط الأساسي يكون ليك مصدر دخل ثابت سواء حكومي أو خاص.

لاحظ أن كل ما بتتأخر في عمل الوثيقة دي قبل سن الـ 60 هتكون مضطر تدفع قسط أكبر علشان تقدر تصرف معاش شهري كويس، ومعظم الشركات المختصة بتأمين المعاش يهمها السن والصحة والوظيفة الثابتة.