5 أفكار للشغل من البيت وتكسب فلوس كويسة

ازاي تطور من شغلك وتشتغل شغل تاني جنب شغلك الأساسي؟ أنت عارف إن الشغل الإضافي دا ممكن يكون في يوم من الأيام هو مصدر دخلك الرئيسي؟ وكمان ممكن يكون بداية الطريق لأنك تفتح مشروع.

1-   إعادة البيع Reselling

كل اللي عليك إنك هتكون سمسار وهتاخد عمولتك، ناس كتير من اللي حواليك عندهم حاجات عاوزين يبيعوها أنت ممكن تاخد الحاجات دي وتصورها وتنزلها على النت سواء عندك على السوشيال ميديا أو متاجر إلكترونية زي أوليكس أو سوق.

ومع الوقت ممكن تفتح متجر إلكتروني خاص بيك وتجيب حاجات جملة وتبيع قطاعي وتزود ربحك.

2-   صناعة المحتوى

فكرت تعمل بلوج بدل ما تكتب على السوشيال ميديا بس، البلوجز من الحاجات المميزة اللي ليها جمهور وتقدر تقدم موضوع وحكاية في نقط بطريقة مميزة، وكمان تقدر تصمم البلوج بنفسك من غير ما تشتري دومين وتنشره وسط أصحابك.

فكرت تساعد الناس تكتبلهم في مدوناتهم وتاخد فلوس وتشتغل كـ content creator  وتاخد فلوس؟ وعلى فكرة صناعة المحتوى دي كبيرة أوي ممكن تساعد الناس في المونتاج والتصوير والإضاء وإدارة صفحاتهم على السوشيال ميديا.

وبعد ما تطور مهاراتك في صناعة المحتوى قدم خدمتك على مواقع العمل الحر.

اعرف دلوقتي ازاي تقدر تحقق ربح إضافي مع 5 مواقع هتساعدك إنك تزود دخلك من البيت!

3-   لغات البرمجة

الموضوع مش معقد زي ما أنت فاكر كل اللي محتاجه تحدد هدفك يعني عاوز تبرمج مواقع إلكترونية ولا أبلكيشن مثلًا، وفي لغات برمجة كتير زي: java-c#-visual bsic-PHP-.

والميزة إن أنت ممكن بلغة برمجة واحدة تكسب آلاف الدولارات في السنة، والكورسات موجودة على النت ممكن تبدأ تطور من نفسك، ومبدئيًا كدا أنت محتاج تحدد لغة واحدة بس، وحط في اعتبارك مش كل لغات البرمجة عبارة عن أكواد.

4-   مراجعة المنتجات

لما بتيجي تشتري موبايل مثلًا بيكون عندك استعداد تقرأ وتشوف المراجعة الخاصة بيه وتشوف أكتر من مراجعة، أنت كمان ممكن تعمل كدا شوف أنت بتحب ايه وابدأ اعمله مراجعة كويسة سواء بالكتابة أو بالفيديو، وممكن كمان تروح تاكل في مطعم وتتكلم عن المكان.

المهم شوف أنت شاطر في ايه ودوس: كتب – عربيات – موبايلات.

5- منتجات منزلية

زي الأكل والهدايا الهاند ميد، وكمان ممكن تسوق لنفسك بالصور والفيديوهات وتبدأ تبيع للي حواليك ومع الوقت هتلاقي الدايرة بتوسع أكتر ونشاطك بيكبر وكمان ربحك.

بالنسبة للهدايا ممكن تشتري ماكينة طباعة وتبدأ تطبع الصور والكلام على التيشرتات، والشغل اليدوي ورسم الصور والماجات والأقلام والأدوات كلها موجودة في السوق مش هتغلب، شوف أنت شاطر في ايه وابدأ.

 ايه هي مميزات الشغل من البيت اللي لازم تعرفها: ليه لازم نحب الشغل من البيت؟