هل أنت فعلاً محتاج تأمين على السفر؟

دايماً لما بتيجي تقدم على فيزا للسفر، بيطلبوا منك تأمين للسفر، بس هل أنت فعلاً محتاجه؟ 

التأمين المفروض بيساعدك في حالة حصول حاجة غلط وأنت مسافر، وبيتحدد أنواع المخاطر اللي بيغطيها على حسب نوع التأمين اللي أنت بتشتريه، كل ما عدد المخاطر اللي بيغطيها بتزيد، كل ما زاد سعر التأمين. 

المخاطر اللي تأمين السفر عادة بيغطيها: 

1. المصاريف الطبية في حالة الحوادث، سواء كانت مصاريف كشف المستشفى أو نقل الإسعاف أو الأدوية، وهكذا وسقف المبلغ المتاح بيعتمد على نوع التأمين، كل ما تدفع زيادة، بيبقى المبلغ المتاح بيزيد. 
2. تأمين ضد المشاكل اللي ممكن تقابلك في المطار سواء فقدان شنطة السفر أو تأخير في الرحلة أو تفويت رحلة الطيران. 
3. تأمين ضد تضييع الباسبور أو حاجتك الشخصية زي الموبايل أو الكمبيوتر أو حتى مجوهرات، وبيبقى في سقف للمبلغ المتاح كتعويض. 
4. الحوادث، وده لو حصلك حاجة وأنت في البلد اللي فيها السفرية زي مثلاً الأوتوبيس اللي أنت مسافر فيه اتقلب أو عملت حادثة عربية، فالمصاريف اللي أنت محتاجها هتبقى متغطية وعلى حسب الحد المتاح طبعاً. 

كل ما عدد المخاطر اللي بيغطيها بتزيد، كل ما زاد سعر التأمين. 

في الآخر، تأمين السفر زي أي تأمين تاني، فايدته الوحيدة هو راحة البال، لإنك بتبقى عارف إن لو حصل حاجة، بيبقى في حد بيشيل معاك العبء المالي، وسواء مطلوب منك أو لا، تأمين السفر مهم إنه يبقى معاك، خصوصاً إنه مش مكلف للدرجة لو اشتريته من شركة التأمين مباشرة مش من مكتب سياحي.