خطة إيلون ماسك لمكسب 2 تريليون دولار في 10 سنين

في مارس 2020 إيلون ماسك، اللي عمره 50 سنة، كان متصنف في قايمة الأغنى في العالم وجه رقم 31 بثروة تقدر بحوالي 25 مليار دولار، وفي 8 يناير 2021 بقى متصدر القايمة بثروة 190 مليار دولار، وحاليًا في 2022 وحسب اخر التحديثات ثروته وصلت لحوالي 245 مليار دولار.

في 10 شهور (من مارس 2020 لـ يناير 2021) بس ثروته زادت حوالي 165 مليار دولار يعني تقريبًا كان بيكسب في اليوم 550 مليون دولار، والسبب إن أسهم تسلا زادت الفترة دي 780% في أكتر سنة العالم خسر فيها فلوس بسبب كورونا.

لو متعرفش خلينا نقولك إن تسلا نفسها كانت على وشك الإفلاس في 2008 وقعدت تخسر فلوس لغاية 2020  

ماسك ساعد المنافسين!

في 2014 إيلون ماسك عمل حاجة غريبة جدًا وهي إنه خلى التكنولوجيا بتاعة تسلا، اللي كانت سابقة العالم كله في العربيات الكهربا، بقت متاحة لكل المنافسين وطبعًا دي كانت مفاجأة مش متوقعة خاصة إنك تدي سرك لحد وأنت كمان بتخسر فالحسبة ع الورق مش مظبوطة.

لكن المفاجأة إن في 2020 الشركة حققت فلوس كتير ودا خلى ناس كتير تستثمر وتشتري أسهم والطلب زاد فالسعر كمان زاد، وتسلا بقت من أهم 5 شركات في العالم بعد ما كانت 55 ع العالم السنة اللي قبلها بس.

بلغة الأرقام الشركة كانت بتخسر لكن فعليًا كل سنة كانت الشركة بتكسب عن السنة اللي قبلها 

سبب نجاح إيلون ماسك

في أكتر من حوار تليفزيوني لإيلون ماسك قال إنه بيشتغل أكتر من 100 ساعة في الأسبوع وهو مقتنع جدًا إنك لو اشتغلت بالشكل دا زيه هتحق اللي الناس بتحققه في سنة في 4 شهور بس.

ازاي الشركة كانت بتخسر وتكسب في نفس الوقت؟

بلغة الأرقام الشركة كانت بتخسر لكن فعليًا كل سنة كانت الشركة بتكسب عن السنة اللي قبلها حتى لو بفارق مش كبير لكن فكرة إيلون ماسك إنه كان بيستثمر كل الفلوس اللي بتدخله وزيادة علشان باصص لقدام علشان يقلل التكلفة على قد ما يقدر ويعمل عربيات بأعداد كتيرة.

خطة إيلون ماسك في الـ 10 سنين الجاية

إيلون ماسك عاوز يعمل 30 مليون تاكسي بدون سواق، ومعروف إنه حاليًا تسلا بتتصدر العالم كله في العربيات ذاتية القيادة، ومن المنتظر وقتها إن تكلفة الميل هتبقى نص دولار مقارنة بـ 2 دولار سعر أوبر للميل.

والسر ورا كدا إن مفيش سواق ومفيش بنزين وكمان والعربية شغالة بالكهرباء، ولو خطة إيلون ماسك اتحققت ممكن تسلا تحقق مبيعات خلال 10 سنين بـ 2 تريليون دولار.