يعني ايه خصخصة وازاي ممكن تفيد البلد؟

فى عالم البيزنس والأعمال بنسمع مصطلحات كتير مهمة فهمها ممكن يساعدنا نتابع الوضع الاقتصادي والمالي للبلد بسهولة. من المصطلحات دي "الخصخصة" اللي بتعتبر من أهم المؤثرات في الاقتصاد الدولي في اخر 30 سنة.
 

تعريف الخصخصة

"الخصخصة" أو"التحول إلى القطاع الخاص" هو مصطلح بيعبر عن انتقال الشركات أو المؤسسات من ملكية الحكومة، اللي بتسمي بالقطاع العام، لملكية الشركات أو الأفراد، اللي بيتسمي القطاع الخاص، وده بيتم عن طريق بيع الأصول.

مميزات دخول الخصخصة لأي بلد

1-بتحسن جودة الخدمات المقدمة، لأن الشركات بيفرق معاها الربح أكتر من الحكومة.

2-بتزيد فرص العمل وبتقلل من نسبة البطالة عن طريق التوسع فى المشروعات، وده بيحتاج لموظفين وعمال جداد.

3-بتخفف العبء على ميزانية الحكومة.

4-بتشجع الاستثمار المحلي والأجنبي على الاستثمار في البلد.

5-بتزيد المنافسة بين الشركات عشان يسلموا المشاريع فى الوقت المتفقين عليه.

6-بتدي فرصة للشركات للابداع فى الأفكار الجديدة وده بيقلل من الروتين اللي معروف في الخدمات الحكومية.

الخصخصة بتزيد فرص العمل وبتقلل من نسبة البطالة عن طريق التوسع فى المشروعات

عيوب الخصخصة

زي ما كل حاجة ليها مميزات وعيوب، كمان الخصخصة بالرغم من مميزاتها ليها عيوب ممكن تسبب مشاكل كتير للحكومات اللي بتستخدمها، زي:

1-احتكار القطاع الخاص لخدمات عامة فى البلد.

2-فى حالة ان الخدمات العامة مكنش عليها رقابة ممكن متوصلش بالشكل المناسب للمواطنين.

3-ممكن تتعرض بعض الخدمات للسيطرة الأجنبية فى حالة استثمار الشركات الأجنبية فى البلد.

4-زيادة أسعار الخدمات العامة.

الخصخصة مش بتتم بسهولة وليها عيوب، لكن كمان ليها مميزات كتير تستحق بسببها أن يكون في دراسة شاملة ليها قبل تطبيقها، وبوجودها الحكومات بتقدر تحقق مكاسب مالية وكفاءة عالية أوي.