يعني إيه مينيماليزم Minimalism؟

كل يوم بنشتري حاجات كتير وبنعمل ليستة بحاجات تانية عايزين نشتريها، بس هل احنا فعلا محتاجين كل الحاجات دي؟

الفترة دي، بنضغط على نفسنا فى توفير الفلوس عشان نشتري في الأخر حاجات معظمها ملوش لازمة احيانا بيبقي عشان مكانا الاجتماعي بيحتاج ده، وأوقات تانية بيبقي عشان كل الناس بتعمل كده ولازم نعمل زيهم، وده بيسبب مع الوقت ضغط مادي وعصبي ونفسي علينا. وهنا الناس دي خدت واقفة  قررت تتابع منهج "المينيماليزم " "Minimalism" أو التقليلية بالعربي، واللي ابتدت كحركة فنية فى الستينات فى امريكا واتحول بعد كده لأسلوب حياة.

يعني إيه "مينيماليزم "؟

ببساطة هو استخدام المفيد والأساسي بس والاستغناء عن أي زوايد ممكن تصعب الحياة، وده عن طريق التخلص من كل حاجة مش مفيدة والاحتفاظ بس بالحاجات اللي ليها أكتر من منفعة أو استخدام، وده بيكون شامل كل حاجة حرفياً من أول الأكل واللبس لغاية كمان طرق التفكير واخد القرارات اللي بتتأثر بعد كده مع اتباعك للمنهج التقليلي.

كل ما يزيد ترتيبك للمكان هيزيد معاه ترتيبك لأفكارك.

فوائد المينيماليزم :

التوفير:

لما تعرف انت محتاج إيه وترتب ميزانيتك عليه، ده أكيد هيساعدك انك ماتتشدش بسهولة لأي سلع مش مهمة، وكمان هيوفرلك كتير.

بيساعدك على تقليل التوتر:

 بعد فترة من استخدام المنهج التقليلي حدة التوتر والتشتت العصبي اللي بتسببه الزحمة في حياتك هيقل، لأنك بتركز بس على الحاجات اللي بتضيفلك بشكل ايجابي، وده  بيوصلك لمراحل أعلى من السلام الداخلي.

زيادة التركيز وتحفيز الإبداع:

صعب تركز في مكان كله كراكيب، عشان كده كل ما يزيد ترتيبك للمكان هيزيد معاه ترتيبك لأفكارك وده هيخلي تركيزك في شغلك يتحسن.

 مفيش overthinking تاني:

بعد ماتعدي على كل النقط اللي فاتت عقلك هيبدأ يصفي ويتخلص من الأفكار السلبية، زي الذكريات السيئة، وهتبدأ تحس أنك حر ورايق ومفيش حاجة ممكن تعكنن عليك.