يعني إيه تمويل عقاري؟ ومكونات القرض العقاري

التمويل العقاري هو قرض بتاخده من البنك أو مؤسسة ائتمانية بهدف شراء عقار ما، وبيبقى العقار ده هو الضامن للقرض، وفي بعض الأحيان التمويل العقاري بيبقى متاح من شركة العقارات نفسها وبشروط معينة.

مكونات القرض العقاري:

المقدم

نسبة من قيمة العقار بيتم دفعها في الأول، وبيتم خصمها من المبلغ الكلي للعقار، والمقدم ما بيبقاش عليه نسبة فايدة، وعشان كدة يفضل إنك تدفع على أد ما تقدر من المبلغ الكلي كمقدم لإنك كدة بتخفض نسبة الفايدة اللي بتدفعها على العقار.

نسبة التمويل

أغلب أنواع التمويل العقاري المتاح من البنوك مش بيسمح لك إنك تمول 100% من قيمة العقار، ولكن بيبقى جزء من القيمة الكلية للعقار، وفي أغلب الأحيان بيتراوح ما بين 70-80% من قيمة العقار.

مدة التمويل

مدة التمويل العقاري بتختلف على حسب نوع القرض المتاح من البنك أو شركة العقارات، بس عادة بيبقى من سنة لغاية 20 سنة كحد أقصى، وعادة لو التمويل متاح من شركة العقارات وبدون فايدة (الفايدة محسوبة في السعر من الأول)، فمدة التمويل بتقل عن لو في فايدة.

أغلب أنواع التمويل العقاري المتاح من البنوك مش بيسمح لك إنك تمول 100% من قيمة العقار، ولكن بيبقى جزء من القيمة الكلية للعقار، وفي أغلب الأحيان بيتراوح ما بين 70-85% من قيمة العقار.

الأقساط الشهرية

هو مبلغ مالي شهري بيتم دفعه لسداد القرض، وقيمته بتعتمد على قيمة العقار، مدة القرض، ونسبة الفايدة على القرض.

نسبة الفايدة

فايدة التمويل العقاري ممكن تبقى فايدة ثابتة أو متناقصة على حسب نوع القرض، وبتختلف على حسب البنك أو الشركة الممولة، بس عادة بتقع ما بين 15% إلى 23%.

المصاريف الإدارية

أي قرض بنكي بيبقى عليه مصاريف إدارية، وعادة بتبقى من 1.5% إلى 2% من قيمة القرض، ودي بتبقى زيادة على قيمة القرض، وبتدفع في الأول.

الغرامات

في بعض الأحيان بيتم دفع غرامة للبنك وعادة بتبقى في حالة التأخير في دفع القسط الشهري أو السداد المبكر للقرض سواء جزئياً أو كلياً، وعادة الغرامة بتتراوح من 2% إلى 3% من المبلغ.