ازاى تآمن نفسك وانت مسافر، وإيه هو تأمين رعاية المسافر؟

بيقولك السفر فيه 7 فوايد، منهم تكوين الصدقات وزيادة المعرفة...إلخ، وزود عليهم السفر للعلاج وللتعليم، لكن دايما بتجيلنا مخاوف من فكرة السفر بره مصر عشان لو حصلت أي مشكلة فجأة، زي انك تتعب مثلاً أو الباسبور يضيع وفلوسك تتسرق، بس تفتكر لو فعلا أخدت الخطوة وسافرت بره وحصلت مشكلة، هتحلها ازاي؟ 

من غير تفكير كتير هتلاقي ان تأمين رعاية المسافر افضل حل ليك في السفر عشان تبقى مطمن على نفسك في بلد متعرفهاش.

ايه هو التأمين؟

هى وثيقة، بوليصة، بتكون بالاتفاق بينك وبين شركة التأمين، وبتختار وقتها نوع التأمين اللى عايزه لو تأمين على العربية، أو تأمين طبي أو تأمين على الممتلكات، وغيرهم.

بس لو بتسافر كتير وعايز تعرف أكتر عن التأمين، اقرأ هنا هل انت فعلا محتاج تأمين على السفر؟

ازاى تأمن على نفسك في السفر؟

على حسب اللى نشرته جريدة " الوطن" على لسان الدكتور هشام رمضان، مساعد رئيس هيئة الرقابة المالية في برنامج " كلمة أخيرة"، واللي وضح ان النوع ده من التأمين هيتطبق بداية من شهر يوليو 2021، وهى وثيقة تأمين إجبارية على سفر المصريين للخارج ضد مخاطر الوفاة، والترحيل، والسرقة والمرض، تحت مسمى " تأمين رعاية المسافر".
 

تأمين رعاية المسافر هى وثيقة تأمين إجبارية على سفر المصريين للخارج ضد مخاطر الوفاة، والترحيل، والسرقة والمرض  

تأمين رعاية المسافر ليه 3 مميزات!

1-  وثيقة التأمين بيتحمل تكاليف الرعاية الطبية خلال رحلة السفر، واللي مدتها متزدش عن 60 يوم متتالين بحد أقصى 30 ألف يورو أو ما يعادلها بالعملات التانية. 

اعرف اخر اسعار العملات الأجنبية ومقارنتها مع الجنيه المصري على موقع فايدتي.

2-  الوثيقة بتدفع تكاليف نقل المسافر من أي دولة لـ مصر في حالة وجود حالة مرضية.

3- في حالة الوفاة، الوثيقة بتتحمل تكاليف إعادة نقل الجثمان لـ مصر.

ايه طريقة دفع أقساط " تأمين رعاية المسافر"؟

مبلغ التأمين بيكون 300 جنيه، وبيدفع مرة واحدة عند تجديد الباسبور كل 7 سنين، والنوع ده من التأمين بيقلل من تكاليف التأمين الطبي اللى بتطلبها منك هيئة تأشيرات السفر، وده في حالة  لو بتسافر كتير خلال مدة سريان الباسبور بتاعك.