يا ترى البنك المركزي ناوي على ايه بشأن أسعار الفائدة؟

ايه القرارات اللي ممكن البنك المركزي المصري ياخدها، في اجتماع بكرة الخميس 19 مايو 2022 بخصوص الفائدة؟ خبراء كتير اتكلموا وتوقعوا ايه اللي ممكن يحصل في اجتماع لجنة السياسة النقدية.

فايدتي هتنقلك بكل بساطة ايه التوقعات اللي قايمة على الظروف الاقتصادية المحلية والعالمية اللي ممكن تخلي لجنة السياسة النقدية تاخد قرارات متوقعة لمواجهة التضخم.

رئيس الوزراء المصري قال ايه عن قرار سعر الفائدة؟ اعرف أكتر من هنا: سعر الفائدة هيزيد ولا هيقل؟ رئيس الوزراء يرد

البنك المركزي المصري وأسعار الفائدة

بكرة الخميس هيكون الكل على انتظار قرارات البنك المركزي المصري بخصوص أسعار الفائدة وسط الظروف الاقتصادية اللي بتمر بيها مصر والعالم، ودا هيدفع متخذين القرار في اللجنة لايه.

لكن كل كلام الخبراء بيشير أن البنك المركزي غالبًا هيكون عنده اتجاه أكيد لرفع سعر الفائدة.

تعرف ايه عن سعر الفايدة؟ اعرف أكتر من هنا: يعني إيه سعر الفايدة ؟

رفع أسعار الفائدة

الخبراء بيقولوا إن البنك المركزي المصري هيرفع بكرة سعر الفائدة للمرة التانية على التوالي، والنسبة غالبًا هتكون بين 0.5% إلى 2%.

ليه البنك المركزي هيرفع سعر الفائدة؟

حسب كلام الخبراء فالبنك المركزي ممكن يرفع سعر الفائدة علشان يقدر يتعامل مع زيادة معدلات التضخم وكمان يدوا فرصة كبيرة للاستثمار إنه يتنافس حقيقي + الحفاظ على الاستثمارات الأجنبية غير المباشرة الموجودة حاليًا.

وكمان الخبراء المصرفيين بيقولوا إن رفع البنك المركزي لسعر الفائدة هيقلل من خروج الاستثمارات بعد رفع الفائدة الأمريكية مؤخرا.

الاجتماع الاستثنائي الأخير للبنك المركزي

خلينا نفكرك إن لجنة السياسة النقدية للبنك المركزي اجتمعت يوم الاثنين 21 مارس 2022 اجتماع استثنائي لتصل سعر الفائدة إلى 9.25% للإيداع و10.25% للإقراض.

ودا كان نفس اليوم اللي تم فيه طرح بنكي "الأهلي المصري" و"مصر" شهادة ادخار مرتفعة العائد بنسبة 18%.

طارق عامر قال ايه النهاردة؟

طارق عامر، محافظ البنك المركزي المصري، قال النهاردة الأربعاء 18 مايو 2022 إن البنك المركزي مش هيتردد في اتخاذ كل الإجراءات اللازمة علشان يواجه التضخم في المستقبل.

ووضح عامر، في كلمته اليوم خلال المؤتمر المصرفي العربي لعام 2022، إن المركزي اتخذ إجراءات خلال شهري مارس وأبريل بهدف تحقيق الاستقرار للنقد الأجنبي.