مؤتمر قمة المناخ في شرم الشيخ 2022 هيفرق معاك في ايه؟

مؤتمر قمه المناخ للأمم المتحدة COP27، واللي بيحضره كل سنه حوالي ١٩٦ دولة حول العالم هيتم إقامته السنة دي لأول مرة في افريقيا في مدينه شرم الشيخ في مصر، وموعد قمة المناخ هيكون في الفترة من ٦ نوفمبر ٢٠٢٢ إلي ١٨ نوفمبر ٢٠٢٢.

وبيحضر مؤتمر قمة المناخ عدد كبير من  قادة دول العالم ومسؤولين نشطاء في أمور البيئة بيتكلموا فيه عن التغييرات المناخية الي بتحصل حول العالم، وبيناقشوا أفضل الحلول للتعامل مع التغييرات دي، وكمان بيقولوا ازاي سلوك الإنسان ممكن يؤدي إلي التغييرات  دي.

معلومات عن قمة المناخ 2022 في مصر

وبتعتبر قمة المناخ 2022 اللي هتكون في شرم الشيخ هي القمه الـ ٢٧ من بدايه الاتفاق علي قمه الأمم المتحده للتغييرات المناخية للحد والسيطره علي الكوارث الطبيعيه وكمان الاقتصاديه اللي ممكن تتسبب نتيجه التغييرات المناخية.

ودا خصوصًا إن الدول النامية علشان هي هتكون أكتر عرضه للخطر وكمان مواردها أقل وازاي نساعد الدول النامية للتعامل مع العواقب اللي ممكن تحصل بسبب التغييرات دي.

دور مصر في قمة المناخ 2022

مصر وقعت علي اتفاقيه الأمم المتحده لتغير المناخ سنه ١٩٩٤ وتعتبر مصر من الدول النامية اللي هتكون أكتر عرضة للكوارث اللي هتحصل بسبب التغييرات المناخية ودا بسبب ارتفاع درجه حرارة الارض ١.٥درجة مئوية.

 علشان كدا كان الرئيس السيسي في قمة المناخ باريس 2016 بيطالب المجتمع الدولي بتوفير ١٠٠ مليار دولار سنويًا للتعامل والحد من الكوارث دي .

مشكلة الاحتباس الحراري

زي ما كلنا عارفين مصر فيها عربيات قديمه كتير بتشتغل بالغاز مش بالبنزين و انبعاثات الغاز ممكن تسبب احتباس حراري ف كان من ضمن الاقتراحات اننا نستبدل كل العربيات دي زي التاكسيات و الميكروباصات القديمه بعربيات جديدة أقل ضرر على البيئة .

ازاي مصر هتتأثر بالتغييرات المناخية؟ 

طبعا زي ما وضحنا مصر هتكون من أكتر الدول تاثرًا بتغييرات المناخ ووزارة البيئة وضحت أهم المخاطر اللي هتتعرض ليها مصر  وهي:

• زيادة أو انخفاض درجة الحرارة عن الطبيعي.
• حدوث فيضانات وعواصف واللي هتاثر علي صحة الإنسان مباشرة وهتؤدي إلي انتشار الأمراض زي الملاريا، وحمي الضنك والغدد الليمفاوية.
• ارتفاع منسوب البحر في المناطق الساحلية ودا هيسبب كوارث في المناطق الساحلية زي تآكل المناطق الساحلية في مصر.
• زيادة معدلات التصحر وانخفاض نقص مخزون المياه .
• اختلاط المياه المالحة بالعذب وهيحصل تدهور في المحاصيل الغذائية .

ازاي مصر هتتأثر اقتصاديًا و بيئيًا؟ 

اتفاقيه قمه المناخ في غلاسكو ٢٠٢١ 

و الاتفاقيه ديه فيها تغييرات كتير هتحصل لشكل حياتنا زي مثلا 

استخدام عربيات الكهرباء بدل البنزين وإن سعر العربية الكهربا الجديدة هيكون مقارب لسعر عربية البنزين علشان أكبر عدد من الناس يقدروا يستخدموها و ده في خلال ٥ سنين.

و اننا نعتمد اكتر علي الطاقه النظيفه و التقليل من استخدام الفحم و في حوالي ٤٠ دوله وقعوا علي اتفاقيه التقليل من استخدام الفحم 

و استخدام الطاقه الشمسيه و النوويه 

و هنبدأ باستخدام المواد اللي فيها كربون أقل في بناء المنازل و نعتمد علي المساحات الخضرا علشان تقدر تساعد في امتصاص الأمطار و نغير شكل البيوت بانها تكون مؤهلة للحماية من الشمس والأعاصير. 

اقتصاديًا العالم كل هيتأثر بسبب التغييرات المناخية 

زي مثلا ارتفاع أسعار بعض الأغذية اللي بيعتمد انتاجها بشكل أساسي على أساليب ضارة بالبيئة زي صناعة اللحوم.

و في أكتر من ٤٠٠ مؤسسة مالية في التمويل الخاص وقعوا علي إنهم يوفروا فلوس في التكنولوجيا صديقة البيئة.