ليه لازم نحب الشغل من البيت؟ 5 أسباب

فى زمن الكورونا اضطرت معظم الشركات تقعد موظفينها في البيت، ومع طول القاعدة موضوع الـ Work from Home بقي أسلوب حياة، وبمناسبة اليوم العالمي لـ Work from Home 17 مايو، هنقولك على حاجات هتحببك في الشغل من البيت وازاي تستفيد من الوضع ده.

1- مفيش تضيع وقت!

وفر الوقت الضايع كل يوم الصبح في اللبس والمواصلات وانت رايح وراجع، كل اللي هتعمله انك تصحي الصبح تفطر وتستعد عشان تبدأ شغل اللي ساعاته هتبقى محسوبة بالدقيقة.

2- لو بتحب تشتغل في هدوء!

في البيت مفيش جو الهيصة بتاع المكاتب، الناس اللي بتنادي علي بعض، واللي بيعمل أوردر أكل، واللي بيحب يشتغل وهو مشغل موسيقى، فهتقدر تخلص اللي وراك وانت قاعد في هدوء وسلام! 

3- لو شخص انطوائي!

لو انت من الناس اللي مش بتحب تعمل صدقات مع زمايل الشغل، أو لو مش بتحب تشتغل ضمن الفريق طول الوقت، أو أصلا شغلك مش محتاج ده، فـ البيت هيبقي أختيار مريح جداً ليك.

أصحاب الشركات هما أكتر ناس مستفيد من القاعدة في البيت لأانهم وفروا كهرباء ونت!

4- هتوفر فلوسك!

بالشغل في البيت انت وفرت في 3 حاجات مهمة:

• الهدوم، انت وفرت شرا هدوم جديدة بقاعدتك فى البيت، لأن كل مانزلت أكتر كل ما هدومك قدمت، فلو قلنا أنك مش هتشتري أكتر من تيشرت فى الشهر وأن ارخص تيشرت ب 150 جنيه، يبقي انت وفرت 150 جنيه على الأقل فى الشهر.
• المواصلات، لو معاك عربية فأكيد وفرت البنزين اللي أسعاره مش مستقرة، ولو بتركب مواصلات فأرخص أتوبيس بقي بـ 5 جنيه، ارخص تذكرة مترو برضه بـ 5 جنيه، وعداد التاكسي بقي بيبدأ بـ 7.5 جنيه، يعني من الاخر وفرت من 10 ل 20 جنيه فى اليوم، فى حالة انك مبتركبش كذا مواصلة.

لو عايز تعرف اخر اخبار البنزين في مصر ممكن تقرأ هنا، ارتفاع أسعار البنزين في مصر

• الأكل، لو هتفطر فى المكتب هتصرف على الأقل 10 جنيه ساندويتشات فول وطعمية، ده لو مش ناوي تجيب وجبة كاملة أو تتغدي كمان هناك، فـ ممكن نقول أنك وفرت من 10 ل 50 جنيه على الأقل فى اليوم.

أما لو صاحب شركة

 فأنت أكتر واحد وفر فى الوضع ده، لأنك وفرت الكهرباء اللي بيستخدمها على الأقل 5 موظفين فى وقت واحد، للنور والتكييفات والكمبيوتر، خصوصا أن أسعار الكهرباء دلوقتى فى زيادة مستمرة، وبعد الزيادة اللي اتطبقت فى يوليو 2020 المكونة من 8 شرايح، ووصلت الشريحة الأولي فيها ل38 قرش من صفر ل 50 كيلو وات والشريحة التامنة فيها ل145 قرش  من صفر لأكثر من 1000 كيلو وات.

لو محتاج نصايح للتوفير في الكهرباء ممكن تقرأ هنا، ازاى توفر في فاتورة الكهرباء؟

 أنت كمان وفرت اشتراك الانترنت لشهور، واللي هيتحدد على حسب احتياج شركتك لخدمات الانترنت، من الآخر أنت وفرت على الأقل 5 ألاف جنيه فى الشهر، لو شركتك صغيرة.

5- الإنتاج بيزيد في البيت!

بعد ما العالم كله جرب الشغل من البيت في الموجة الأولى من كورونا، في شركات كتير استغلت الفرصة دي وحققت نجاحات في مجالات مختلفة وده لأن الموظفين بعدوا عن أي عمل بيأثر علي شغلهم، زي الدوشة وتضيع الوقت في الواصلات، و……..إلخ.