ازاي تحجز تذاكر قطارات عيد الفطر 2022 من الموبايل؟

اعرف ازاي تقدر تحجز تذاكر السفر في قطارات السكة الحديد في عيد الفطر 2022 مع فايدتي، خاصة إن خلال الفترة الجاية بيكون في إقبال كبير من الركاب على السفر علشان يقضوا إجازة العيد مع أهاليهم.

هنقولك على طريقة حجز تذاكر قطارات السكة الحديد في عيد الفطر 2022 من خلال الموبايل، ولو أنت متعرفش خلينا نقولك إن السكة الحديد أعلنت عن إتاحة حجز تذاكر القطارات من المحمول بنسبة 20%.

وهنقولك كمان على مواعيد عمل قطارات السكة الحديد في الفترة من 25 أبريل لغاية 10 مايو 2022.

اعرف كمان: زكاة الفطر 2022: دليلك للجمعيات الخيرية والمستشفيات

ازاي تحجز تذاكر سفر القطارات من الموبايل؟

هتدخل لموقع سكك حديد مصر من هنا "لو موبايلك اندرويد"، ومن هنا لو موبايلك ايفون.

هتسجل "مستخدم جديد" وهتدخل بيانات المستخدم، واللي هي "الاسم، البريد الإلكتروني، والهاتف".

بعد كدا هتدخل على النظام بعد التسجيل من خلال إنك هتدخل اسم المستخدم وكلمة المرور.

بعدها هتختار محطتي القيام والوصول وتاريخ السفر.

اختار دلوقتي رقم القطار وعدد المقاعد والدرجة، في حالة وجود كراسي متاحة.

هيتطلب منك تدخل بيانات الدفع المطلوبة في شاشة الدفع بالبنك.

النظام هيعرضلك بيانات الحجز، ويجري إرسالها للبريد الإلكتروني للمستخدم، ويمكن طباعة البيانات.

في الخطوة دي هتروح للمقعد المحدد بحسب القطار والعربة ورقم المقعد في بيانات الحجز، في موعد الرحلة ويعرض المستخدم بيانات الحجز للمختص في القطار عند الطلب.

بس خليك عارف كويس إنه متاح لكل راكب صرف 4 تذاكر بس ببطاقة الرقم القومي.

اعرف أكتر عن موعد العيد والإجازة بالظبط من هنا: موعد عيد الفطر 2022: وقت الصلاة وإجازة العيد

مواعيد الرحلات الأولى في عيد الفطر 2022

• أول رحلات عيد الفطر 2022 في قطارات السكة الحديد هتكون يوم 25 أبريل الحالي الموافق 24 رمضان.
• وكل القطارات جاهزة إنها تنقل الركاب على خطوطها بالوجهين القبلي والبحري.

الفترة من 25 أبريل لغاية 10 مايو 2022

قطار 1936 مكيف القاهرة / أسوان: هيتحرك من محطة القاهرة الساعة 23:45 يعمل يوميًا.

قطار 1937 مكيف أسوان / القاهرة: هيتحرك من محطة أسوان الساعة 21:45 يعمل يوميًا.

قطار 2202 روسي القاهرة / أسوان: هيتحرك من محطة القاهرة الساعة 15:15 يعمل يوميًا.

قطار 2203 روسي أسوان / القاهرة: هيتحرك من محطة أسوان الساعة 15:00 يعمل يوميًا.

قطار 2204 روسي القاهرة / أسوان: هيتحرك من محطة القاهرة الساعة 00:40 يعمل يوميًا.

قطار 2203 روسي أسوان / القاهرة حيث ينطلق من محطة أسوان الساعة 10:00 يعمل يوميًا.

قطار 1940 مكيف الإسكندرية / أسوان هيتحرك من محطة الإسكندرية الساعة 17:30.

قطار 1941 مكيف أسوان / القاهرة: هيتحرك من محطة أسوان الساعة 23:55.

قطار 1942 ثالثة مكيفة القاهرة / أسوان: هيتحرك من محطة القاهرة الساعة 16:55 يعمل يوميًا.

قطار 1943 ثالثة مكيفة أسوان / القاهرة: هيتحرك من محطة أسوان الساعة 20:00 يعمل يوميًا.